Häärzligg Willkomme

, Stadler Sascha

Syg wie de wottsch

Am Samschtig het s'Basler Fasnachts-Comité d'Katz uss em Sagg gloh und s'Sujet und d'Blaggedde 2025 vorgestellt.

Bezieh kasch die verschiedene Schmuggstügger bi unserne Aggdivmitglieder. Au Online, also diräggt bym Comité, isch das mögligg. Gib dört unsere Verein aa - so kömme mir zu de glyche Subventione wie über dr normali Verkauf.
Härzzligg Danggscheen.

Kupfer CHF 10.00  
Silber CHF 20.00  
Gold CHF 50.00  
Bijou, Anstecker CHF 100.00  
Bijou, Anhänger CHF 100.00

 

Blaggeddee-Värs 2025 

Syg wie de wottsch 

Jä unsri ney Fasnachts-Blaggedde 
Het ussergweenlig vyyl Facette  
Dr Guido Happle het se designed 
Und die ganzi Fasnacht so veraint 
E Harlekin und au e Pierrot 
Jä au en Ueli gseht me do 
Drzue kunnt no e Blätzlibajass 
Und au e Waggis us em Elsass 
Die Alti Dante ganz adrett 
Macht so die Rundi no komplett 


E Drummle und e Piccolo 
Dien fir d Clique dodruff stoh 
Mit sim Stägge git exaggt  
Dr Major a no scheen dr Taggt 
Unter em Himmel mit de Stärne 
Lyychtet häll e Stäggeladärne 
Und schliesslig gsehsch no z letsch emänd 
S het ebber Zeedel in de Händ 
Dr Vortrab isch so au drby 
S will jo kai Cliquen ooni sy 


E Helge jä dä isch do dängg 
Fir unsri gliebte Schnitzelbängg 
E Zoggeli – und das isch klar 
Isch jo e Waggis-Accessoire 
Und so sin d Wääge unsri nätte 
Beschtens jetz do au verdrätte  
E Pauker paukt no bin re Gugge 
Und fillt so no die letschti Lugge 


E jede freut sich ab em ander 
E herrlig Gwiehl e Duurenander 
Wies numme an dr Fasnacht git 
Und alli mache friidlig mit 
Wo duets das denne sunscht no gä 
Me darf ys gärn als Vorbild nä 
Und jede so wien är grad will 
Farbig, lutt und als au schrill 
Eso verstoot jetz jede Dottsch 
S Fasnachts-Motto «Syg wie de wottsch» 


Das isch dr Kärn – das isch d Idee 
Maint s Fasnachts-Comité