Imagine Picasso, Klimt, Hodler und Klee -  
Immersivi Uusstellige git s mee und mee, 
Und miir vo de HUNNE finde s aifach e Hit, 
Und mache dernoo by däm Trend jetz au mit.

Dynamischi Erfaarig und Interaggtion, 
Sound, Thäggscht, Design und villicht Projeggtion -  
Folg unsere Schritt und dauch mit is yy 
In die neischti Foorm vo Carnival Reality (CR™):

Um 1440, esoo nimmt me s aa, 
Mache sich der Witz und syyni Gselle draa, 
Bim Predigerglooschter eppis Gettligs z erschaffe, 
Uff der Kiirchhoofsmuur fir all die wältlige Affe.  

Vom Sindefall bis zem jingschte Gricht 
Verzellt das Wäärgg die eewig woor Gschicht, 
Ass der Schlussaggt, woo me sis Lääbe verloot, 
E letschts Dänzli isch, und zwoor mit em Dood.

Aaber au an däm Fresko gnaagt der Zaan vo der Zyt, 
Und alli Reschtaurierige bringe halt nyt. 
S verjääst soo gryyslig, oh bhiet is Gott, 
Dass d Stadt dä Schandflägg besittige loot.

Nur weenigi Bruchstigg het me kenne bewaare, 
Woo im Historische Museum iiri Gschicht offebaare. 
Und hitt zellt unsere Dootedanz, gopferdoori, 
Zu de wäältwyt bikanntischte Memento Mori.

Vor Abryss het der alt Mätti Merian, zem Gligg, 
Kupferblatte gmacht vo jeedem ainzelne Stigg, 
Und in Buechfoorm het äär s au grad bubliziert, 
Dass me waiss, wäär der Gvatter us em Lääbe fiert.

Eb alt, eb jung, eb guet ooder schlächt - 
Em Sänsemaa sinn alli ains und rächt. 
Eb ryych, eb aarm, eb bees ooder hailig - 
Äär holt amänd alli ooni Underdailig.

Elai e Naar erkennt scho uff Äärde, 
Dass miir us Staub koo sinn und Staub wäärde wäärde, 
Und miir wien e Sandkoorn im Gfääss vo der Zyt 
In d Gschicht yyneriis’le wie alli andere Lyt.

Der Dood wiird ändlos uff em Wälteagger danze, 
So schafft äär wiider Ruum fir ganz neii Pflanze. 
S Saatguet vo morn spriesst uff der Äärde vo gescht, 
Und der Reige mit em Gvatter isch aigentlig e Fescht.

Im Momänt waggst vyyl Ungrut, es isch e Gruus, 
E mänggi Pflanze versäärblet und stiirbt vill z frie us. 
Miir froogen is drum, eb me de Haini kennt bätte, 
As äär statt z danze aifach emool richtig wuurd jätte! 

2026_Fasnachtszeedel.pdf